ವಿಜಯನಗರ:ಕಟ್ಟಡ ಕಾರ್ಮಿಕನ ಸಣ್ಣಜ್ಜರ ದೊಡ್ಡ ಹನುಮಂತಪ್ಪನ ಮಗನಿಂದ ದೇಶ ಸೇವೆ: 17 ವರ್ಷ ಸೈನಿಕ ಸೇವೆ ಮುಗಿಸಿ ಹುಟ್ಟೂರಿಗೆ ಮರಳಿದ ಕೆರೆಗುಡಿಹಳ್ಳಿಯ ಹೆಮ್ಮೆಯ ಯೋಧ ಸಣ್ಣಪ್ಪ
ಕೆರೆಗುಡಿಹಳ್ಳಿ (ಹರಪನಹಳ್ಳಿ ತಾ): ದೇಶದ ಗಡಿಯಲ್ಲಿ 17 ವರ್ಷಗಳಿಗೂ ಹೆಚ್ಚು ಕಾಲ ನಿಸ್ವಾರ್ಥ ಸೇವೆ ಸಲ್ಲಿಸಿದ ಕೆರೆಗುಡಿಹಳ್ಳಿ ಗ್ರಾಮದ ಯೋಧ ಸಣ್ಣಪ್ಪ ಅವರು ಸೈನಿಕ ಸೇವೆಯಿಂದ ನಿವೃತ್ತರಾಗಿ ತಮ್ಮ ಹುಟ್ಟೂರಾದ ಕೆರೆಗುಡಿಹಳ್ಳಿಗೆ ಮರಳಿದ್ದಾರೆ. ಇದು ಇಡೀ ಗ್ರಾಮಕ್ಕೆ ಹೆಮ್ಮೆಯ ಕ್ಷಣ.
ಸಣ್ಣಪ್ಪ ಅವರು ಸಾಮಾನ್ಯ ಕುಟುಂಬದಿಂದ ಬಂದವರು. ಅವರ ತಂದೆ ಕಟ್ಟಡ ಕೆಲಸ ಮಾಡುವ ಕಾರ್ಮಿಕರು. ಆರ್ಥಿಕ ಸಂಕಷ್ಟದ ನಡುವೆಯೂ ದೇಶ ಪ್ರೇಮವನ್ನು ಮೈಗೂಡಿಸಿಕೊಂಡು ಭಾರತೀಯ ಸೇನೆಗೆ ಸೇರಿದರು. ದಲಿತ ಸಮಾಜದ ಈ ಯುವಕ ತೋರಿಸಿದ ಛಲ ಇಂದಿನ ಯುವ ಪೀಳಿಗೆಗೆ ಮಾದರಿಯಾಗಿದೆ.
ಸಣ್ಣಪ್ಪ ಅವರು ಸೇವೆಯ ಅವಧಿಯಲ್ಲಿ ದೇಶದ ಹಲವು ಕಠಿಣ ಗಡಿ ಪ್ರದೇಶಗಳಲ್ಲಿ, ಕಾಶ್ಮೀರದಿಂದ ಈಶಾನ್ಯ ರಾಜ್ಯಗಳವರೆಗೆ ಸೇವೆ ಸಲ್ಲಿಸಿದ್ದಾರೆ. ಚಳಿ, ಮಳೆ, ಹಿಮವನ್ನು ಲೆಕ್ಕಿಸದೆ ದೇಶದ ರಕ್ಷಣೆಗೆ ನಿಂತಿದ್ದಾರೆ.
ಜಾತಿ, ಬಡತನ ಎಂಬ ಅಡೆತಡೆಗಳನ್ನು ಮೀರಿ ದೇಶದ ಅತ್ಯುನ್ನತ ಸೇವೆ ಮಾಡಬಹುದು ಎಂಬುದನ್ನು ಸಣ್ಣಪ್ಪ ಅವರು ತೋರಿಸಿಕೊಟ್ಟಿದ್ದಾರೆ. ಕಟ್ಟಡ ಕಾರ್ಮಿಕನ ಮಗನೊಬ್ಬ ಈ ದೇಶದ ಸೈನಿಕನಾಗಿ ನಿವೃತ್ತನಾಗಿ ಬರುತ್ತಿರುವುದು, ಸಂವಿಧಾನದ ಸಮಾನತೆಯ ಆಶಯಕ್ಕೆ ಸಾಕ್ಷಿಯಾಗಿದೆ.
ನಿವೃತ್ತ ಯೋಧ ಸಣ್ಣಪ್ಪ ಅವರಿಗೆ ಕೆರೆಗುಡಿಹಳ್ಳಿ ಗ್ರಾಮಸ್ಥರು ಅದ್ಧೂರಿ ಸ್ವಾಗತ ಕೋರಲು ಸಿದ್ಧತೆ ನಡೆಸಿದ್ದಾರೆ. ಅವರ ಅನುಭವ, ಶಿಸ್ತು ಗ್ರಾಮದ ಯುವಕರಿಗೆ ಸ್ಫೂರ್ತಿಯಾಗಲಿದೆ.
ಸಣ್ಣಪ್ಪ ಅವರಂತಹ ಸೈನಿಕರೇ ಈ ದೇಶದ ನಿಜವಾದ ಆಸ್ತಿ. ಅವರ ಸೇವೆಗೆ ಇಡೀ ಹರಪನಹಳ್ಳಿ ತಾಲೂಕಿನ ಕೆರೆಗುಡಿಹಳ್ಳಿ ಗ್ರಾಮದ ಪರವಾಗಿ ಗೌರವ ನಮನಗಳು.
