ಭೂತ, ಪ್ರೇತ, ಪೀಶಾಚಿಗಳನ್ನು ಓಡಿಸುವುದಾಗಿ ಪ್ರಚಾರ ಮಾಡುತ್ತಿದ್ದ ಮಂತ್ರವಾದಿಯೊಬ್ಬ ತನ್ನ ಪತ್ನಿಯ ಕೈಯಲ್ಲೇ ಭೀಕರವಾಗಿ ಕೊಲೆಯಾಗಿರುವ ಘಟನೆ ಬಿಹಾರದ ಕಿಶನ್ಗಂಜ್ ಜಿಲ್ಲೆಯಲ್ಲಿ ನಡೆದಿದೆ. ಪತ್ನಿಯು ತನ್ನ ಪ್ರಿಯಕರನ ಸಹಾಯದಿಂದ ಪತಿಯ ತಲೆ ಕತ್ತರಿಸಿ, ದೇಹದ ಭಾಗಗಳನ್ನು ಬೇರೆ ಬೇರೆ ಕಡೆ ಹೂತುಹಾಕಿರುವ ಘೋರ ಕೃತ್ಯ ಬೆಳಕಿಗೆ ಬಂದಿದೆ.
ಘಟನೆಯ ಹಿನ್ನೆಲೆ:
ಕೊಲೆಯಾದ ಮಂತ್ರವಾದಿಯನ್ನು ಇಮಾಮ್ ಎಂದು ಗುರುತಿಸಲಾಗಿದೆ. ಆತನ ಪತ್ನಿ ಮೋಮಿನಾ ಬೇಗಂಗೆ ಸುದೀಪ್ ಎಂಬಾತನೊಂದಿಗೆ ಅನೈತಿಕ ಸಂಬಂಧವಿತ್ತು. ಈ ವಿಷಯ ಇಮಾಮ್ಗೆ ತಿಳಿಯುತ್ತಿದ್ದಂತೆ ಆತ ಪತ್ನಿಗೆ ತೀವ್ರವಾಗಿ ಎಚ್ಚರಿಕೆ ನೀಡಿದ್ದನು. ಇದರಿಂದ ಕೋಪಗೊಂಡ ಮೋಮಿನಾ, ಪತಿಯನ್ನು ಮುಗಿಸಲು ಸಂಚು ರೂಪಿಸಿದ್ದಾಳೆ.
ಸಂಚು ಮತ್ತು ಕೊಲೆ:
ಪಶ್ಚಿಮ ಬಂಗಾಳದ ಗಡಿಗೆ ಹೊಂದಿಕೊಂಡಿರುವ ಪ್ರದೇಶದಲ್ಲಿ ದೊಡ್ಡ ಪೂಜೆಯೊಂದಿದೆ, ಅಲ್ಲಿ ಹೋದರೆ ಭಾರಿ ಹಣ ಸಿಗುತ್ತದೆ ಎಂದು ಮೋಮಿನಾ ತನ್ನ ಪತಿಗೆ ಆಮಿಷ ಒಡ್ಡಿದ್ದಾಳೆ. ಇದನ್ನು ನಂಬಿದ ಇಮಾಮ್ ಆಕೆಯೊಂದಿಗೆ ಹೊರಟಿದ್ದಾನೆ. ಮಾರ್ಗಮಧ್ಯೆ ಚಹಾದ ತೋಟವೊಂದರ ಮೂಲಕ ಹಾದುಹೋಗುತ್ತಿದ್ದಾಗ, ಅಲ್ಲಿಯೇ ಹೊಂಚು ಹಾಕಿ ಕುಳಿತಿದ್ದ ಪ್ರಿಯಕರ ಸುದೀಪ್ ಮತ್ತು ಆತನ ಮೂವರು ಸಹಚರರು ಇಮಾಮ್ ಮೇಲೆ ಏಕಾಏಕಿ ದಾಳಿ ನಡೆಸಿ ಕೊಲೆ ಮಾಡಿದ್ದಾರೆ.
ಪೊಲೀಸರ ತನಿಖೆಯಿಂದ ತಪ್ಪಿಸಿಕೊಳ್ಳಲು ಆರೋಪಿಗಳು ಇಮಾಮ್ ತಲೆಯನ್ನು ಕತ್ತರಿಸಿ, ಮುಂಡ ಮತ್ತು ತಲೆಯನ್ನು ಚಹಾ ತೋಟದ ಬೇರೆ ಬೇರೆ ಸ್ಥಳಗಳಲ್ಲಿ ಹೂತು ಹಾಕಿದ್ದಾರೆ.
ಬೆಳಕಿಗೆ ಬಂದ ಕೃತ್ಯ:
ಕೆಲ ದಿನಗಳ ನಂತರ ಚಹಾ ತೋಟದಲ್ಲಿ ಕೆಲಸ ಮಾಡುತ್ತಿದ್ದ ಕಾರ್ಮಿಕರಿಗೆ ತೀವ್ರ ದುರ್ವಾಸನೆ ಬಂದ ಹಿನ್ನೆಲೆಯಲ್ಲಿ ಅವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಪೊಲೀಸರು ಜಾಗವನ್ನು ಅಗೆದು ನೋಡಿದಾಗ ಇಮಾಮ್ನ ಮುಂಡ ಮತ್ತು ಅದರಿಂದ ಸ್ವಲ್ಪ ದೂರದಲ್ಲಿ ತಲೆ ಪತ್ತೆಯಾಗಿದೆ.
ಇಮಾಮ್ ನಾಪತ್ತೆಯಾಗಿರುವ ಬಗ್ಗೆ ಆತನ ಸಂಬಂಧಿಕರು ನೀಡಿದ ದೂರಿನ ಮೇರೆಗೆ ಪೊಲೀಸರು ತನಿಖೆ ಚುರುಕುಗೊಳಿಸಿದಾಗ ಅಸಲಿ ವಿಷಯ ಹೊರಬಿದ್ದಿದೆ. ಪೊಲೀಸರ ವಿಚಾರಣೆ ವೇಳೆ ಪತ್ನಿ ಮೋಮಿನಾ ಬೇಗಂ ಮತ್ತು ಆಕೆಯ ಪ್ರಿಯಕರ ಸುದೀಪ್ ತಾವೇ ಕೊಲೆ ಮಾಡಿರುವುದಾಗಿ ತಪ್ಪೊಪ್ಪಿಕೊಂಡಿದ್ದಾರೆ. ಸದ್ಯ ಪೊಲೀಸರು ಇಬ್ಬರೂ ಆರೋಪಿಗಳನ್ನು ಬಂಧಿಸಿ ಜೈಲಿಗಟ್ಟಿದ್ದಾರೆ.
