ಲಿಂಗಸುಗೂರು ಅ.20: ರಾಯಚೂರು ಜಿಲ್ಲಾ ಆಡಳಿತ ರಾಜ್ಯೋತ್ಸವ ಪ್ರಶಸ್ತಿ ಕೊಡುವುದನ್ನು 2017 ರಿಂದ ಸ್ಥಗಿತಗೊಳಿಸಿತ್ತು. ಈಗ ಎರಡು ವರ್ಷದಿಂದ ಅರ್ಹರಿಗೆ ಮತ್ತೆ ಕನ್ನಡ ರಾಜ್ಯೋತ್ಸವ ಅಂಗವಾಗಿ ಹೊಸದಾಗಿ ಎಡೆದೊರೆ ನಾಡು ಎಂಬ ಪುರಸ್ಕಾರವನ್ನು ನೀಡುವ ಪರಿಪಾಠಕ್ಕೆ ಮುಂದಾಗಿರುವುದು ತುಂಬಾ ಶ್ಲಾಘನೀಯವಾದದ್ದು ಹಾಗೂ ಜಿಲ್ಲೆಯ ಅಲೆಮಾರಿ ಪ್ರತಿಭಾವಂತರನ್ನು ಗುರುತಿಸಿ ಜಿಲ್ಲಾಮಟ್ಟದ ಎಡೆದೊರೆ ನಾಡು ಪ್ರಶಸ್ತಿ ನೀಡುವುದಕ್ಕೆ ಜಿಲ್ಲಾಡಳಿತ ಮುಂದಾಗಲೆಂದು ಅಲೆಮಾರಿ ಜಾಗೃತ ಸಂಘದ ಅಧ್ಯಕ್ಷ ಬಸವರಾಜ ಹಟ್ಟಿ ಹೇಳಿದರು.
ಅಲೆಮಾರಿಗಳು ಮೂಲದಲ್ಲಿ ಭಿಕ್ಷೆ ಬೇಡುವ ಸಮುದಾಯಗಳಾಗಿರಲಿಲ್ಲ, ಸಾಂಸ್ಕೃತಿಕ ಸಮುದಾಯಗಳು ಆಗಿದ್ದವು. ಆದ್ದರಿಂದ ಪ್ರತಿವರ್ಷ ಎಡೆದೊರೆ ನಾಡು ಪುರಸ್ಕಾರ ಘೋಷಣೆ ಮಾಡುವಾಗ ಒಬ್ಬರಾದರೂ ಅಲೆಮಾರಿ ಸಾಧಕರನ್ನು ಗುರುತಿಸಿ ಆಯ್ಕೆ ಮಾಡುವ ಕಾಳಜಿಯನ್ನು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ರಾಯಚೂರು ಮಾಡಬೇಕಿದೆ. “ಶಾಸ್ತ್ರೀಯ ಕಲಾವಿದರಿಗಿಂತ ಜನಪದ ಕಲಾವಿದರೇನೂ ಕಡಿಮೆಯಿಲ್ಲ. ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಟ್ಟದಲ್ಲಿ ಕಲಾವಿದರನ್ನು ಗುರುತಿಸಿ ಅವರು ಸಹ ಈ ದೇಶದ ಹೆಮ್ಮೆ, ಆಸ್ತಿ ಅನ್ನುವಂತಹ ಮನೋಭಾವನೆಯನ್ನು ಬಿತ್ತಬೇಕಿದೆ” ನಮ್ಮ ಜಿಲ್ಲೆಯಲ್ಲಿ ಅಲೆಮಾರಿ ಪ್ರತಿಭಾವಂತ ಕಲಾವಿದರ, ಸಾಧಕರ ಕೊರತೆ ಏನೂ ಇಲ್ಲ. ಅಂತಹ ಪಟ್ಟಿ ಜಿಲ್ಲಾಡಳಿತದಲ್ಲಿ ಇರದಿದ್ದರೆ ಒಂದು ವೇಳೆ ಹೇಳಿದರೆ ನಮ್ಮ ಸಂಘಟನೆ ಒದಗಿಸಲು ಸಿದ್ಧವಿದೆ. ಅಲೆಮಾರಿಗಳಿಗೆ ರಾಜ್ಯೋತ್ಸವ ಎಡೆದೊರೆ ನಾಡು ಪುರಸ್ಕಾರ ನೀಡಿ ಸನ್ಮಾನಿಸಿ ಗೌರವಿಸುವ ಕಾರ್ಯ ಆಗಬೇಕಿದೆ ಎಂದರು.
ಆಯ್ಕೆಯು ನಿಷ್ಪಕ್ಷವಾಗಿ ಪಾರದರ್ಶಕವಾಗಿ ಇರಬೇಕಾದರೆ ಅಧಿಕಾರಿಗಳೇ ಕುಳಿತು ಪ್ರಶಸ್ತಿ ಆಯ್ಕೆ ಮಾಡುವುದರಿಂದ ಪ್ರಶಸ್ತಿಯ ಘನತೆ, ಗೌರವದ ಮಹತ್ವ ಕಳೆದುಕೊಳ್ಳುವ ಪ್ರಮೇಯವೂ ಇರುತ್ತದೆ. ಹಾಗಾಗಿ ಅಂತಃಪ್ರಜ್ಞೆಯ ಆಸ್ಥೆಯಿಂದ ಜಿಲ್ಲೆಯ ಅಲೆಮಾರಿ ಪ್ರತಿಭಾವಂತರನ್ನು ಗುರುತಿಸಿ ಗೌರವಿಸುವ ಕೆಲಸ ಆಗಬೇಕಿದೆ ಹಾಗೂ ನವೆಂಬರ್ ಒಂದರ ರಾಜ್ಯೋತ್ಸವ ಹಿಂದಿನ ಒಂದು ಅಥವಾ ಎರಡು ದಿನಗಳ ಮುಂಚಿತವಾಗಿ ಸುದ್ದಿಗೋಷ್ಠಿ ಮೂಲಕ ಅಧಿಕೃತವಾಗಿ ಜಿಲ್ಲಾಡಳಿತ ಆಯ್ಕೆ ಮಾಡಿದ ಪುರಸ್ಕೃತರನ್ನು ಘೋಷಿಸಲಿ. ಬಿಸಿಲನಾಡನ್ನು ಸಾಂಸ್ಕೃತಿಕ ನಾಡನ್ನಾಗಿ ಪರಿವರ್ತಿಸುವ ಹೊಣೆಗಾರಿಕೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಹಾಗೂ ಜಿಲ್ಲಾಡಳಿತದ ಮೇಲೆ ಇದೆ ಹಾಗಾಗಿ ಜಿಲ್ಲೆಯ ಎಲ್ಲಾ ಪ್ರಕಾರದ ಕಲಾವಿದರನ್ನು ಗುರುತಿಸಿ ಸಾಂಸ್ಕೃತಿಕ ಬೇರುಗಳನ್ನು ಇನ್ನೂ ಗಟ್ಟಿಗೊಳಿಸಲು ಅಣಿಯಾಗಬೇಕೆಂದು ಬಸವರಾಜ ಹಟ್ಟಿ ಹೇಳಿದರು.
